‘Ranforsi ou Lavenir Finansie Avek Enn Credit Union’
Zedi le 20 Oktob 2022, 118 pei, 375 million Credit Unionist, 86,451 Credit Unions partou dan lemond pou selebre 74iem laniverser “International Credit Union Day” (ICU Day).
Mouvman Credit Union Mondial finn koumans selebre “International Credit Union Day” apartir Oktob 1948, presizeman sak 3iem zedi mwa Oktob.
Kouma sak lane, 74 banane selebrasion ICU Day pe organize par 2 lorganizasion Mondial baze dan lamerik, World Council of Credit Unions (WOCCU) e Credit Union National Association (CUNA). Sa 2 lorganizasion-la zot finn kontinyelman travay pou lavansman Credit Union o-nivo mondial.
Pou mark sa evennman-la, tematik ki finn swazir sa lane-la, se ‘Empower Your Financial Future with a Credit Union’.Moris nou pou dir :Ranforsi ou Lavenir Finansie avek enn Credit Union.
Pou la fami Credit Unionist, 3iem zedi mwa Oktob 2022, le 20 oktob kan nou pe selebre ICU Day lor tematik “Ranforsi ou Lavenir Finansie avek enn Credit Union” li inportan ki nou gard antet kriz ekonomik e kriz finansie ki pei e lemond pe fer fas.
Zordi, prekarite, detres sosial e apovrisman pe prodwir par diferan kriz parmi seki o-ba lesel ; avek non-aksesibilite finans pou sertenn kategori sitwayen(n), ki li o-nivo labank ou lezot institision finansye; dayer atraver lemond ena 1.4 milliar dimounn ki pa fer okenn trazaksion avek labank.
Alor li neseser bann mamb ki deza dan Credit Union (CU), vinn donn koudme ranforsi nou Credit Union atraver nouvo lide. An memtan donn koudme propaz filozofi e valer Credit Union avek lintansion ranforsi adezion dan mouvman pou ki CU kapav form parti solision a zot problem finans.
Pou konpran linportans vinn mamb dan enn sosiete Credit Union li sifi ekout temwayaz Mme F. Brasse, mamb The Mount and Pamplemousses Cooperative Credit Union Ltd (MPCCU) depi plizir lane. Se avek boukou konviksion ki Mme F. Brasse enn parmi plizir santenn nou bann mamb rakont progre so lafami finn fer avek soutyen finansye MPCCU.
Pou konklir, Credit Union se enn labank sou kontrol kolektif so bann mamb pou progre dan zot lavi sosial ek ekonomik. Credit Union friktifye larzan kontribiyab e reparti li ant zot an form dividenn. Nou ed nou mamb, sorti dan difikilte, kan ena sirplis, sirplis distribye avek sak mamb.
Georges Legallant
Oktob 2022