AK DE KONSTRIKSION MPCCU
28 Novam 1974 – 28 Novam 2022. 48 ans depi ki enn group travayer Ex- The Mount Sugar Estate, ti donn enn lak de nesans a seki zordi nou finn erite:
‘The Mount and Pamplemousses Co-operative Credit Union Ltd’ (MPCCU).
Ak de konstriksion MPCCU ti koumanse le 12 Oct 1974, pou akerir so lak de-nesans le 28 Nov 1974 divan rezistrar avek No. 676. Depi sa zour-la, lavantir ant ed sosial e finansie a bann reveni modes finn demare. Pena dout ki a lepok se lespri solidarite ant kad e ouvriye ex-The Mount S.E e osi lakominote vilazwaz ki ti prime.
Gide par bann valer non diskriminatwar, bann mamb fondater ti ouver zot Credit Union a bann dimounn ki pa ti pe travay dan tablisman The Mount Sugar Estate “Hats off” a zot tou koni ou inkoni ki deryer enn tel kreasion.
48 ans apre, enn tel ak de konstriksion ankor merit nou “Standing Ovation” a tou dimounn ki finn donn zot letan pou akous enn sosiete ki zordi ena enn institision pou antred sosial e finansie.
Nesans MPCCU ti dan enn moman krisial, pei ti o-milye lane 70/80, boukou fwaye Morisien ti an kriz. Finans ti inaksesib; pou boukou fami ti difisil pans enn gran proze sosial etandone lapey ti bas ek preker. Boukou fami ti rwine avek preter larzan (Kaser) ki ti sel rekour avek lintere abizif.
Sertenn fami ti pe investi gro dan ‘sit’, me, sa ousi, li pa ti san risk. ‘Sit’ ti ena so kargezon problem, parfwa dimounn pa peye kan zot fini tous zot kass, ena kit landrwa, dimoun mor etc. Fas a sa detres finansier la The Mount CCU ti pe ed dimounn. A lepok, mamb ti pe pran loan 2,000 roupi. Plafon loan ti 5,000 roupi ek sa ti vo lor pou sak fwaye mwayen.
Depi so kreasion ziska zordi, kan pe selebre 48 ans, boukou fami kapav temwayn progre zot finn fer avek MPCCU. Zordi zanfan mamb Credit Union kontab, profeser, zournalis, polisie, inzenier ek gradiye. Mamb credit Union proprieter motosiklet, loto, later ek lakaz.
OGMENTASION PLAFON LOAN
Pendan 48 an, bann mamb e board direkter, sakenn finn kontribiye pou MPCCU ariv kot li ete. Sakenn nou sarye enn sertenn santiman fierte. Credit Union zordi ena enn ladres fix dan Maison Blanche, Pamplemousses. Pou zanfan ena enn Junior Scheme. Plafon Loan ki ti 5,000 finn ariv 100,000 roupi.
Nou Credit Union finn rant dan ler teknolozik; Li vre ki teknolozi finn diminie, kontak sosial ant mamb direkter e bann mamb a traver Internet Banking, Standing Order. Li enn mal neseser etandone letan finn vinn enn komodite rar. Se pou konpans sa ki bann direkter inn trouv linportans kre enn Web site : https://mpccu.org ki ou pou kapav partaz ek ou koleg, kamarad, fami pou gard tou mamb ‘in touch’ komdi Angle.
Alor, Bonn Aniverser MPCCU !!!