MERCI ET BRAVO A TOU MAMB !
Lane 2022 finn ariv ver lafin ; pena dout, 2022 finn enn lane difisil lor plan sosial e finansye. Boukou fami a reveni modes finn bizen fer fas bann gro difikilte larzan pou devlop nouvou proze pou lakaz. Erezman, The Mount and Pamplemousses Co-operative Credit Union Ltd (MPCCU) finn la pou fer parti solision sa bann fami la. MPCCU finn diboute pou kapav ed zot avanse dan zot proze.
Selon, enn ti matematik vit fe, pou lane 2022, MPCCU finn donn loan plis ki enn santenn fami. Seki vedir, san ed lakes kominn MPCCU, li ti pou inposib pou boukou fami ena proze domestik.
Anfet, pou ki li posib soulaz dimoun ki mamb dan MPCCU, se gras a tou bann mamb ki finn kontribiye atraver renboursman loan, lintere e kontribision share. Enn mas larzan ki sak mwa redistribiye parmi bann mamb.
Sa mem prinsip ki nou apel ‘People helping people’. Sa mem ki reprezant bote solidarite imin kan sak individi avek diferan reveni regroupe dan enn kolektivite amenn led a so prosin dan diferan kous sosial.
Mersi e bravo a tou bann mamb MPCCU ki finn partisip dan sa lasenn solidarite, osi bien dan prinsip ‘People helping people’. Dayer li bon rapel ki pandan tou long lane mazorite bann mamb finn asim zot responsabilite san fay. Mem si parfwa finn bizen fer koustik dan menaz. Bravo !!!
Bravo ousi bann mamb ki malgre letan difisil zot finn resi trouv ek enn ti kas pou ogmant zot kontribision share e Junior Scheme zot zanfan.
Valer aktyel, tou previzion lokal ek internasional pe dir ki lane 2023 pa pou reprezant tro bel sanzman par rapor a bann lane presedan lor plan finansye. Avek lager e ogmantasion pri manze, pri materio konstriksion larzan pou bann ti proze domestik pou touzour difisil.
Pou nou kapav fer fas lefe nefas enn katastrof sosial, li devwar la fami Credit Unionist vinn plis prevwoyan.
Pandan trwa lane MPCCU pa finn an mezir fer lasanble zeneral anyel akoz konfinnman; sa finn enn andikap pou fonksyonnman demokratik. Debi lane 2023 pou ena Lasanble Zeneral, alor li pou ena enn gran linportans lor plan institisionel.
Lane 2023 pou exziz enn konsolidasion bann gran valer ek prinsip ki finn touzour gid mouvman korperativ. Nou pou bizen resolidifie nou prinsip solidarite par amenn ankor plis dimounn.
Alokazion 48 iem laniverser MPCCU le 28 Novam 2022, Prezidan Mr. N. Armoogun dan so mesaz finn anonse ki nou pou bizen kree enn ‘Fondation’ pou vinn an ed a seki pli demini dan lasosiete. An memetan linn ousi dir pe bizen kre enn ‘lasirans intern pou nou bann mamb’
Nou swete 2023 reprezant enn lane porter de freser e klarte pou MPCCU e tou so bann mamb.
Pou termine MPCCU swet tou bann mamb enn bonn ane 2023.
Nou zwenn dan prosenn Lasanble Zeneral.
Georges LEGALLANT
Desam 2022