International Day of Cooperatives 2023

Korperativ: Partner Pou Enn Devlopman Dirab Akselere

Samdi le 01 zilyet 2023 lemond pou selebre 101iem Zourne International Korperativ ; sa zourne-la li selebre sak premie Samdi mwa Zilyet.

Zourne International Korperativ li enn zourne proklame par Nasion Zini an 1995 pou met an evidans kontribision inik mouvman korperativ pou batir enn lemond kot fer bon pou viv.  Premie tras mouvman korperativ ti idantifie dan enn vilaz an Ecosse le 14 Mars 1761. Partou dan lemond mouvman korperativ finn touzour port deviz ‘rann lavi so bann mamb meyer’.

Sa lane-la, pou selebre enn tel evennman international, tem selebrasion 2023 li “Korperativ: Partner pou enn devlopman dirab akselere”. Atraver lemond ena de santenn de million individi regroupe dan diferan kalite mouvman korperativ.  Mem si ena diferans, ena enn pwin komin parmi tou ; seki zot tou angaze dan lavansman sosyete e lintere zot bann manb.

Dan Moris, parey; premie mouvman korperativ finn inplante an 1913 dan sekter kann. Zordi mouvman korperativ li dan diferan sekter lavi sosyo-ekonomik.  Ena anviron 1,000 typ sosyete koperativ dan lavi ekonomik e sosyal pei. Ena korperativ kann, lapes, agrikol, lelvaz, artisanal etc.  Dan le pase ti mem ena korperativ lasante (Bambous Health Project), nou kapav sit ankor e ankor.  Sosyete koperativ regroup anviron 155,000 mamb e li ena enn sif dafer anviron 5 milliard roupi.

Isi, seki konsern nou inpe plis, se korperativ kredit seki nou apel ‘Credit Union’ (CU). Depi bien lontan dan Moris CU finn zwe enn rol determinan dan mikro-finansman bann mikro proze de boukou fami Morisien e Morisienn.  Boukou sa bann fami-la pa ti ena akse a finansman banker, etandone zot reveni feb e preker.  Credit Union ti enn file proteksion pou sa bann fami-la.

Le 01 zilyet, kan nou selebre Zourne International Korperativ, pena dout nou pe selebre reisit nou bann mamb ki finn sorti dan lomb pou vinn dan lalimier avek kontribision Credit Union.  Nou pe ousi selebre la sazes sak individi ki finn zwenn kolektif korperativ Credit Union ki reprezant enn labank popiler. Enn lakes kominn de enn labank popiler ki finn met finansman a la dispozision de millie fami san diskriminasion.

Li vre ki Credit Union finn enn instriman de finansman, me Credit Union finn ousi ena enn kontribision remarkab dan konba kont lamizer e landetman.  Dayer mouvman Korperativ finn toultan roule pou konstriksyon enn lemond meyer. Dan MPCCU nou rev se konstrir enn lemond meyer kot ena plis lespwar anterm redistribision larises dan enn fason ekitab ; e ousi devlop enn aktivite sosio-ekonomik pli partisipativ ek inklisiv.

Georges LEGALLANT