“S” kouma dan “Sit” ou dan “Saving”
Dan Enn Kad Legal
Lontan, dan vilaz kouma dan lavil boukou dimounn ti ena tradision met “Sit”. “Sit” se enn form kolek kolektif ki fer sak mwa, sak kinzenn. Li vedir ramas larzan enn sertenn nomb individi pou “Saving”, apre redistribiye som ki finn ramase ant zot dan enn lord sakenn so tour. Dan “sit” ena enn kolekter ki benefisye enn ti poursantaz pou so zefor organiz kolek ek distribision.
Dan lepase, boukou fami ti depand lor “Sit”pou lev enn som larzan pou avans enn proze famiyal. Kan enn fami ti pe lev “Sit” ena ti pe fer maryaz zot zanfan; renov lakaz, aste enn meb ou aste enn laparey electro menaze pou anbeli lakaz etc…
Parey, dimounn ti pe nouri zanimo: bef, kabri, koson. Lelvaz ti pran enn lot fason “Saving”pou kapav fer progre dan lavi ki ti bien difisil pou dimounn ordiner.
Met “Sit”, nouri zanimo, toulede metod “Saving”ena zot risk. O-milye enn “Sit”parfwa Sitiasion ekonomik enn dimounn kapav vinn insoutenab kan li perdi so travay, malad; lot kapav kit landrwa ou mem dimounn mor. Parey, zanimo kapav mor avek maladi.
Erezman, pratik “Sit”finn inpe transforme atraver Credit Union (CU). Dan CU zordi aktivite “Saving” fer dan enn kad legal atraver bann regleman kouma “Rule” ek “Loan Regulation”. Linstitision e so bann mamb bizen respekte regleman pou bon deroulman aktivite-la.
Kolekte larzan individyel pou redistribiye li similer a “Sit”. Diferans, kan sa aktivite-la vinn sou kontrol Credit Union ena plis sekirite pou larzan ki kolekte.
Pamplemousses ena The Mount and Pamplemousses Co-operative Credit Union Ltd (MPCCU) ki kontenir enn tigit filozofi e lespri “Sit”. MPCCU la pou fer travay ki “Sit” fer, ed mamb ki ena difikilte gayn aksesibilite a larzan pou avans divan dan lavi.
MPCCU se enn labank kominn kot sak mamb enn aksioner apar antyer. MPCCU fer so travay avek tou Valer neseser ; dabor e avan tou demokratik e transparan. San distinksion, relizion, kouler lapo, kominote, preferans politik e lezot diskriminasion ki riske diviz nou. Partisipasion sak mamb li indispansab dan progresion sosiete-la.
Dan MPCCU ou vinn enn mamb avek drwa egal e prinsip “One Person One Vote”. Apre sis mwa ki ou finn rant mamb, MPCCU kapav donn ou enn loan trwa fwa kantite larzan ki ou finn akimile.
Kontrerman, kan ou lev “Sit” ou pran tou kas ki ou finn ekonomize pandan plizir mwa. Dan MPCCU ou pran enn loan san ki ou pran seki ou finn ekonomize. Enn loan se larzan Credit Union; larzan ki ou finn “save” res lor ou kont an tout sekirite.
Larzan lor ou kont li capav ousi raport dividen; ou gayn dividen lor som ki ou ena.
Kan ou pran larzan prete depi MPCCU, ou ranbours kapital e ou pey enn to dintere de enn poursan (1%) lor seki ou dwa atan reel. Sif ki ou peye kouma lintere kapav vinn pli ba si ou pey ou loan pli vit ki ou kontra prevwar.
Georges LEGALLANT