Pa Rant Dan Langrenaz Infernal Landetman
Lane 2023 finn zis koumanse; ansam a nou rezwenn tou nou lafors pou nou ranforsi lide mouvman Credit Unionist pou ki Credit Union vinn ankor pli solid, pli prezan lor terin.
Zordi, avek Covid e neo-liberalism lemond antye pe fer fas enn kriz ekonomik. Sa mem kriz pe retresi nou kapasite pans nouvo proze pou nou lakaz. Ledikasyon zanfan dimann boukou larzan. Konstriksion e renovasion lakaz pe vinn difisil. Demar enn ti bizines, res touzour penib pou dimounn ki fye lor so lapey.
‘Hire Purchase’, labank tradisionel pe pratik enn to lintere bien ot. An kontras, lot kote, erezman mem si li difisil li pa inposib avek kudme Credit Union. Zordi, li enn fe, MPCCU avek Selman enn lintere 1% lor balans ki ou dwa pe ede pou kapav fer mirak pou resi realiz rev de dimounn ordiner.
Oule u pale, sipor Credit Union avek so filozofi “People Helping People”, dan ninport ki parti nou Repiblik, rezilta li vizib kot Credit Union prezan. Seki vedir, MPCCU pena okenn dout lor so capasite pou ‘take care’ bann fami ki vinn ver nou pou zot pa rant dan langrenaz infernal landetman.
Pou ki Credit Union kapav etal so filet proteksion a ankor plis dimounn ki pena mwayen, nou bizen azir avek lanpati e solidarite. Sak mamb nou bizen seye amenn nou vwazin e vwazinn ki pa ankor vinn mamb. Nou bizen ankouraz nou lafami pou vinn mamb. Li indispansab ki nou kontribye dan Junior Scheme nou zanfan.
Pandan 3 lane, demokrasi dan nou Credit Union finn soufer enn gran kou kan pa finn kapav reyni pou lasanble zeneral anyel akoz bann rezon saniter. Sa lane-la nou pe prepar lasanble zeneral anyel avek plizir proze. Li pou inportan ki bann mamb parey kouma bann lane avan montre zot devouman abityel an seki konsern devlopman nou Credit Union.
Lafin lane dernie, MPCCU finn sinbolikman mark so 48 an lexzistans; seki vedir dan mwins ki 2 an nou pou selebre demi syek lexzistans. Alor, li pou inportan ki sak mamb koumans dialog ek bann direkter pou donn so lide dan ki fason li panse ti pou convenab selebre enn tel evennman.
Kouma nou finn touzour dir “The future belongs to the organized”. MPCCU li pa enn labank kot ou vinn met kas, pran loan ou tir kas. Dan Credit Union ou enn mamb ki ena drwa laparol, drwa fer sikzesion, drwa pou partisip dan kreasion larises sosiete-la. Alor, fer ou enn devwar vinn ver bann direkter pou ouver enn dialog pou organize. Aster nou ena nou site https://mpccu.org kominik avek nou pou fer nou Credit Union avanse.
Georges LEGALLANT