Dimans 30 Avril 2023
Enfin ! ler finn vini pou The Mount and Pamplemousses Co-operative Credit Union Ltd (MPCCU) kapav organiz so lasanble zeneral anyel ; enn moman ki tou bann mamb ti pe atann depi dernie trwazan avek rezon,. Enn lasamble zeneral se enn moman bien krisial dann lexzistans enn sosiete, lasanble li sa moman-la kot kolektivman tou mamb prezan pran konesans progresion sosiete.
Pandan trwazan, pou rezon saniter pa finn an mezir organiz enn tel ekzersis demokratik osi inportan pou bon fonksionman e enn transparans sosiete.
Dimans 30 Avril 2023 lasanble pe fer apartir 9er30 dan Centre Social Pamplemousses. Sa zour-la’ li bien inportan ki sak mamb fer enn ti sakrifis pou prezan. Prezidan, sekreter, trezorzye ek lezot mamb Board ki finn zer MPCCU pandan trwazan Covid-19 pou rann kont progre ek difikilte ki finn gagne.
Trwazan, pa finn fer lasanble zeneral, board pa finn an mezir donn enn leta finansye me malgre bann restriksion kapav dir finn ena boukou devlopman pozitif ki prezidan pou liste dan so rapor. Sa zour-la, pou ena ousi prezantasion enn rapor finansye odite, pou lane 2019/2020, 2020/2021, 2021/2022. E osi bann mamb pou pran konesans bidze pou lane 2022/2023, 2023/2024.
Prezans bann mamb dan lasanble Dimans 30 Avril, li plis ki neseser parski pou ena diskision lor propozision MPCCU pou met dibout enn ‘Share and Loan Protection Scheme’. Lide deryer sa propozision-la li sorti depi dan enn lasanble ki ti fer avan. MPCCU anvi kontinie dan filozofi elarzisman file proteksion pou protez tou bann mamb niport ki zot laz.
Dan lasanble pou ena ousi kestion Jubile, 50 ans lekzistans MPCCU ki pou selebre Novam lane prosenn. Kouma ou pou trouve anplis de bann azanda routinn ki ena labitid dan lasanble, sa lane-la bann mamb pou ena bann gran desizion pou pran pou kontinie fer MPCCU avanse. Pou MPCCU kapav kontinie fer progre, li inportan ki sak mamb vinn partisip dan lavi sosiete-la, alor pa rat lokazion pou vinn enn parti prenant dan sak desizion ki pou amenn MPCCU ver so agrandisman. MPCCU kont lor ou sipor Dimans 30 Avril 2023 parey kouma ou osi ou kapav kont lot MPCCU.
Georges LEGALLANT
Avril 2023