50ans KOT A KOT

50an. Demi syek, kot a kot, 50an sakenn dan nou fason finn amenn nou kontribision pou nou ariv ziska la.

50an kot a kot; The Mount and Pamplemousses Co-operative Credit Union Ltd finn ekrir mo listwar, ou listwar, nou listwar ansam. Ena ki nepli la, ena ki ankor la, ena ki finn fer enn bout sime. A la fin nou tou finn ekrir 50an listwar sa Credit Union la. Natirelman, finn ena le-ba e ousi bien le-o.
Laiss mo dir ou :
An 2010 nou ti ena 850 mamb, zordi 2024 nou ena 1600 mamb. Nou Share an 2010 ti 3.7 millions roupi, zordi li 14.5 millions roupi. Pandan dernie 15ans nou finn donn plis ki 65 millions roupi kouma loan. Sa ki apel Solidarite.

Zordi, ou ki prezan la, se pou selebre Solidarite. Dan moman kan laport finans pou lavi avanse ti ferme, mouvman Credit Union so laport ti ouver.
Sakenn de nou kan nou get deryer, nou bizen trouv enn konstriksion, enn asset, enn zanfan ki finn marye, enn zanfan ki finn etidie, ou ki finn gradie. Enn mamb ki finn demar enn bizines avek loan Credit Union.

Kifer nou dir sa Solidarite ? Rapel ki mouvman koperativ, se pran kontribision vwazin planter legim, prêt lot vwazin ki enn mason, pran kontribision ek madam koutiryer pou prêt a madam travayer lizinn. Nou apel sa antre-ed. Samem solidarite.
Solidarite, antre-ed apel li kouma oule, Sa ki fer lavi vinn fasil ek zoli; parski dan Credit Union nou pa get figir ; nou pa gete ki ou relizion, ki ou kouler, ki ou apartenans politik.
Dan sa mem optik la, li bon mo fer ou kone ki nou finn met dibout enn lasirans pou tou nou bann mamb ki aze lao 75 yrs ki pa kouver par lasirans normal. Ankor enn fwa samem Solidarite.

Ki enn mamb li lor Board ou ki li prezan dan lasanble zeneral, tou dimounn egal. Partou se lespri “One person, one Vote”. Nou apel sa demokrasi. Parey tou dimounn ena drwa koze, dir seki li panse, demande ki pe pase pou li kone. Sa tip demokrasi-la pa exziste partou.
Ou swa pou zwenn nou Credit Union li enn swa intelizan, parski Credit Union form parti dan trouv solision de ou problem. Ena enn malad dan lafami, enn dese, enn maryaz, Credit Union nou sansib.
Les mo donn ou enn lexzamp konkre. An 2020 ek 2021, katastrof saniter. Lemond afekte avek COVID-19, lockdown. Bann mamb board atraver video konferans pran desizion pou redwir lintere par 50% pou sak mamb ki ena loan. Samem ki apel solidarite-flexib.
Ou kapav ena kas dan pli gran labank dimonde, ou kapav travay pou pli gran lantrepriz me ou pa proprieter labank la ni lantrepriz la.
Les mo anons zot enn bon nouvel: depi la fin septam 2024 nou TOU proprieter later e batiman Credit Union. An 10ans nou finn ranbours Labank plis ki 4 millions roupi.

Mersi a Nou bann Mamb ki finn pret nou preske 200,000 roupi pou fer finish dan nou batiman. Ti enn defi pou ariv-la. Prosenn defi res pou pey dividen a nou bann mamb.

Pou termine : Lor nom Board, mo Remersie tou bann mamb pou zot konfians plase dan Credit Union.
Mo ousi remersi Minister korperativ, nou legal adviser, nou loditer, nou Internal controller Mauritius Co-operative Alliance ek tou lotorite ki finn ed nou ziska zordi. Enn mersi spesial a Patisserie Pamplemousses ki finn ofer nou sa zoli gato laniverser-la.

Mo pou fel si mo pa remersi mo bann mamb Board, bann ansien mamb Board e bann Ex-Prezidan.
Nou rann enn omaz a tou sa bann mamb fondater ki finn ena sa lide pou form sa Credit Union-la, sa lepok la. Anpartikilier Feu Mr. Henry Marc Maury ek Feu Mr. Gaby Thomas. San oubliye tou bann dimounn ki finn ed dan enn fason ou enn lot pou ki nou ariv kot nou finn arive.

Dimans 15 Desam 2024